Komiks Turned Movies

Kung magreresearch lang ako ng mas matagal at kung marami akong oras at pera, mahigit pa siguro sa isangdaan ang mahahanap kong mga pamagat ng Komiks na naisapelikula noong mga 1950's hanggang sa mga huling taon ng 1980's. Karamihan sa mga komiks na ito ay sikat pa rin hanggang ngayon tulad na lang ng Darna at Captain Barbell ni Mars Ravelo, Panday at Bakekang ni Carlo J. Caparas, Pedro Penduko ni Francisco V. Coching at marami pang iba.

Wala akong alam na Library na may mga koleksyon ng mga lumang komiks at kung meron man ay maaaring matagpuan sa mga pahina ng lumang Liwayway na mayroong kopya sa Pambansang Aklatan pero hindi na maaaring ipa photocopy dahil bukod sa luma na ito ay halos maagnas na ang mga kopya nito, konting lamukos mo lang yata ay magiging abo na pero sa kabutihang palad ay mayroon na itong Microfilm format na maaari mong magview ng mga pahina ng Liwayway ng hindi nangangati (dahil talaga namang makati sa balat ang mga naaagnas na liwayway) at maipaprint kung kinakailangan.

Nakita ko ang iba't ibang isyu ng liwayway noong 1950's at marami akong natuklasan, una, mga isandaan ang pahina ng Liwayway kumpara sa Kasalukuyan, ikalawa, marami ditong nag a advertise tulad ng CoCa Cola, Star Margarine, Tikitiki at iba pa na pawang mga malalaking kumpanya sa bansa noon, ikatlo, marami ka ring makikita tungkol sa mga lumang pelikula noon at nagpapalagay din ng patalastas tungkol sa nalalapit na pelikulang ipalalabas na kung hindi sa Life ay sa Dalisay; at huli, ilan sa mga klasikong nobelang tagalog ay dito unang nailathala gaya ng Timawa ni M.S. Martin at Titser ni Liwayway Arceo.

Nakapanghihinayang lang na hindi naitabi ng Tiyahin ko ang ilang kopya niya ng Liwayway na binabasa niya dati, noon pa. Nais ko rin sanang magkaroon ng kopya ng Liwayway at maging ng Bulaklak na nailathala noong mga 1950's hanggang 1980's.

Bakekang

Natapos kamakailan lamang ang Bakekang. Naging popular sa mga manonood ang kasaysayan ng isang pangit na nangarap na gumanda at maging isang sikat na artista. At bilang isang dakilang movie fan, ninais niyang makatuntong sa mundo ng showbiz kahit man lamang sa pamamagitan ng kanyang anak na si Kristal, anak niya sa isang Amerikano.

Likha ng batikang Direktor na si Carlo J. Caparas, unang lumabas ang Bakekang bilang isang komiks. Nailathala ito sa Bonying Komiks. Nang isapelikula ang Bakekang, si Nora Aunor ang gumanap sa papael ni Bakekang at ang pelikula ay dinerek mismo ni Carlo J. Caparas. Sa ngayon, maraming nagsasabing wala nang kopya ng pelikula nito upang muling ipalabas o di kaya ay isa VCD bilang isa sa mga koleksyon ng mga pelikula ng Superstar...

Matagal na panahon din bago muling ginawa ang pelikula, ngayon ay sa pormang pang telebisyon. Bagamat noong una ay pinuna, si Sunshine Dizon ang napiling gumanap ng pangunahing papel mula sa maraming ibang pangalan ng artista na naging bulung-bulungan na gaganap sa papel. Mula sa original na kuwento, nagkaroon ng ilang pagbabago sa kwento ng Bakekang tulad na lamang sa mga naging anak ni Bakekang. Sa Komiks at Pelikula, isa lamang ang anak ni Bakekang at ito'y si Kristal ngunit sa telebisyon, ang naging anak ni Bakekang ay kambal, ito ay si Kristal na maganda at si Charming na isang pangit bukod sa taglay nitong balat na maiitim, ang mga ito ay anak ni Bakekang sa dalawang magkaibang lalaki na parehong dayuhan na ang isa ay Amerikanong puti at ang isa ay nergro. Bagamat maraming bagay ang binago mula sa orihinal na istorya, naging bukambibig pa rin ito ng mga tao at naging matagumpay na palabas sa Primetime.

At ang obrang ito ay mananatili sa mga pilipino bilang salamin ng pang araw-araw na paghihirap at pangangarap sa buhay...

Sa sinumang may kopya ng pelikulang Bakekang ni Nora Aunor, sana i share nyo sa kin, gustong mapanood kung pa'no dinala ni Nora 'tong papel ni Bakekang...